ਪੰਜਾਬ ਦੀ ਮਿੱਟੀ ਵਿੱਚ ਖੇਡਾਂ ਦਾ ਜਜ਼ਬਾ ਰਚਿਆ-ਵਸਿਆ ਹੈ। ਖਾਸ ਕਰਕੇ ਕਬੱਡੀ ਇਸ ਧਰਤੀ ਦੀ ਪਛਾਣ ਬਣ ਚੁੱਕੀ ਹੈ। ਇਸ ਖੇਡ ਨੇ ਪਿੰਡਾਂ ਦੀਆਂ ਗਲੀਆਂ ਤੋਂ ਲੈ ਕੇ ਅੰਤਰਰਾਸ਼ਟਰੀ ਮੰਚਾਂ ਤੱਕ ਵੱਡੇ-ਵੱਡੇ ਸਟਾਰ ਖਿਡਾਰੀ ਪੈਦਾ ਕੀਤੇ ਹਨ। ਅਜਿਹੇ ਹੀ ਉਭਰਦੇ ਹੋਏ ਸਿਤਾਰਿਆਂ ਵਿੱਚੋਂ ਇੱਕ ਨਾਮ ਹੈ ਗੰਗਾ ਸ਼ਰਮਾ, ਜਿਸਨੇ ਆਪਣੇ ਹੌਸਲੇ, ਮਿਹਨਤ ਅਤੇ ਅਟੱਲ ਇਰਾਦਿਆਂ ਨਾਲ ਕਬੱਡੀ ਦੇ ਮੈਦਾਨ ਵਿੱਚ ਆਪਣੀ ਵੱਖਰੀ ਪਛਾਣ ਬਣਾਈ ਹੈ। ਗਰੀਬ ਪਰਿਵਾਰ ਵਿੱਚ ਜਨਮ ਲੈ ਕੇ ਵੀ ਉਸਨੇ ਸਾਬਤ ਕਰ ਦਿੱਤਾ ਹੈ ਕਿ ਜੇਕਰ ਮਨ ਵਿੱਚ ਦ੍ਰਿੜ-ਇਰਾਦਾ ਹੋਵੇ ਤਾਂ ਹਾਲਾਤ ਕਦੇ ਵੀ ਰਾਹ ਦੀ ਰੁਕਾਵਟ ਨਹੀਂ ਬਣਦੇ।
ਗੰਗਾ ਸ਼ਰਮਾ ਦਾ ਜਨਮ ਸਾਲ 2007 ਵਿੱਚ ਜ਼ਿਲ੍ਹਾ ਫਤਿਹਗੜ੍ਹ ਸਾਹਿਬ ਦੇ ਪਿੰਡ ਕੋਟਲਾ ਬਜਵਾੜਾ ਵਿੱਚ ਇੱਕ ਸਧਾਰਨ ਪਰਿਵਾਰ ਵਿੱਚ ਹੋਇਆ। ਸੀਮਿਤ ਆਰਥਿਕ ਸਾਧਨਾਂ ਦੇ ਬਾਵਜੂਦ ਉਸਦੇ ਪਰਿਵਾਰ ਨੇ ਉਸਦੇ ਸੁਪਨਿਆਂ ਨੂੰ ਪੰਖ ਦੇਣ ਵਿੱਚ ਕੋਈ ਕਸਰ ਨਹੀਂ ਛੱਡੀ। ਬਚਪਨ ਤੋਂ ਹੀ ਉਸਦੀ ਰੁਚੀ ਖੇਡਾਂ, ਖ਼ਾਸ ਕਰਕੇ ਕਬੱਡੀ ਵੱਲ ਸੀ। ਪਿੰਡ ਦੇ ਮੈਦਾਨਾਂ ਵਿੱਚ ਦੌੜਦੇ-ਖੇਡਦੇ ਹੋਏ ਉਸਨੇ ਆਪਣੀ ਲਗਨ ਅਤੇ ਸਮਰੱਥਾ ਨਾਲ ਸਾਬਤ ਕਰ ਦਿੱਤਾ ਕਿ ਉਹ ਭਵਿੱਖ ਵਿੱਚ ਇੱਕ ਕਾਬਲ ਖਿਡਾਰਨ ਬਣ ਸਕਦੀ ਹੈ।
ਗੰਗਾ ਸ਼ਰਮਾ ਦੀ ਖੇਡ ਯਾਤਰਾ ਨੂੰ ਦਿਸ਼ਾ ਦੇਣ ਵਿੱਚ ਉਸਦੇ ਕੋਚ ਡੀਪੀ ਮੰਗਾ ਸਿੰਘ ਅੰਟਾਲ ਦਾ ਬਹੁਤ ਵੱਡਾ ਯੋਗਦਾਨ ਹੈ। ਕੋਚ ਮੰਗਾ ਅੰਟਾਲ ਦੀ ਸਖ਼ਤ ਮਿਹਨਤ, ਤਜਰਬੇ ਅਤੇ ਪ੍ਰੇਰਣਾ ਨੇ ਗੰਗਾ ਦੀ ਪ੍ਰਤਿਭਾ ਨੂੰ ਨਿਖਾਰਨ ਵਿੱਚ ਅਹਿਮ ਭੂਮਿਕਾ ਨਿਭਾਈ। ਉਹ ਕਬੱਡੀ ਵਿੱਚ ਸੱਜੇ ਪਾਸੇ ਦੀ ਰੇਡਰ ਅਤੇ ਡਿਫੈਂਡਰ ਵਜੋਂ ਖੇਡਦੀ ਹੈ ਅਤੇ ਮੈਦਾਨ ਵਿੱਚ ਆਪਣੀ ਫੁਰਤੀ, ਦਮਦਾਰ ਪਕੜ ਅਤੇ ਹਿੰਮਤ ਨਾਲ ਵਿਰੋਧੀ ਟੀਮ ਲਈ ਮੁਸ਼ਕਲਾਂ ਖੜ੍ਹੀਆਂ ਕਰ ਦਿੰਦੀ ਹੈ।
ਗੰਗਾ ਸ਼ਰਮਾ ਨੇ ਆਪਣੀ ਸਕੂਲੀ ਪੜ੍ਹਾਈ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ, ਕੋਟਲਾ ਬਜਵਾੜਾ ਤੋਂ ਪੂਰੀ ਕੀਤੀ। ਪੜ੍ਹਾਈ ਦੇ ਨਾਲ-ਨਾਲ ਉਸਨੇ ਖੇਡਾਂ ਵਿੱਚ ਵੀ ਆਪਣਾ ਜਲਵਾ ਦਿਖਾਇਆ। ਬਾਰਵੀਂ ਜਮਾਤ ਪੂਰੀ ਕਰਨ ਤੋਂ ਬਾਅਦ ਉਹ ਇਸ ਸਮੇਂ ਗੁਰੂ ਕਾਸ਼ੀ ਯੂਨੀਵਰਸਿਟੀ, ਤਲਵੰਡੀ ਸਾਬੋ ਤੋਂ ਚਾਰ ਸਾਲਾ ਡਿਗਰੀ ਕੋਰਸ ਬੈਚਲਰ ਆੱਫ ਫਿਜ਼ੀਕਲ ਐਜੂਕੇਸ਼ਨ ਐਂਡ ਸਪੋਰਟਸ ਕਰ ਰਹੀ ਹੈ। ਇਹ ਗੱਲ ਵੀ ਕਾਬਿਲ-ਏ-ਗੌਰ ਹੈ ਕਿ ਉਹ ਆਪਣੀ ਪੜ੍ਹਾਈ ਦੇ ਨਾਲ ਨਾਲ ਖੇਡਾਂ ਵਿੱਚ ਵੀ ਲਗਾਤਾਰ ਉੱਚੇ ਮੁਕਾਮ ਹਾਸਲ ਕਰ ਰਹੀ ਹੈ।
ਗੰਗਾ ਸ਼ਰਮਾ ਦੀਆਂ ਪ੍ਰਾਪਤੀਆਂ ਬਹੁਤ ਹੀ ਪ੍ਰਭਾਵਸ਼ਾਲੀ ਹਨ। ਸਟੇਟ ਪੱਧਰੀ ਮੁਕਾਬਲਿਆਂ ਵਿੱਚ ਉਸਨੇ ਕਈ ਵਾਰ ਆਪਣੇ ਸ਼ਾਨਦਾਰ ਪ੍ਰਦਰਸ਼ਨ ਨਾਲ ਮੈਡਲ ਜਿੱਤੇ ਹਨ। ਅੰਡਰ-19 ਸਟੇਟ ਪੱਧਰੀ ਮੁਕਾਬਲਿਆਂ ਵਿੱਚ ਉਸਨੇ ਦੋ ਵਾਰੀ ਸੋਨੇ ਦੇ ਤਗਮੇ ਜਿੱਤੇ, ਜੋ ਉਸਦੀ ਪ੍ਰਤਿਭਾ ਦਾ ਸਪੱਸ਼ਟ ਪ੍ਰਮਾਣ ਹਨ। ਇਸ ਤੋਂ ਇਲਾਵਾ ਅੰਡਰ-20 ਵਿੱਚ ਇੱਕ ਗੋਲਡ ਅਤੇ ਇੱਕ ਸਿਲਵਰ ਮੈਡਲ, ਜਦਕਿ ਅੰਡਰ-17 ਵਿੱਚ ਦੋ ਵਾਰੀ ਕਾਂਸੇ ਦੇ ਤਗਮੇ ਹਾਸਲ ਕੀਤੇ। ਸੀਨੀਅਰ ਸਟੇਟ ਪੱਧਰ ‘ਤੇ ਵੀ ਉਸਨੇ ਦੋ ਵਾਰੀ ਸਿਲਵਰ ਮੈਡਲ ਜਿੱਤ ਕੇ ਆਪਣੀ ਕਾਬਲੀਅਤ ਦਾ ਲੋਹਾ ਮਨਵਾਇਆ ਹੈ।
ਸਟੇਟ ਪੱਧਰ ਤੋਂ ਬਾਅਦ ਗੰਗਾ ਸ਼ਰਮਾ ਨੇ ਨੈਸ਼ਨਲ ਪੱਧਰ ‘ਤੇ ਵੀ ਆਪਣਾ ਦਬਦਬਾ ਕਾਇਮ ਕੀਤਾ। ਅੰਡਰ-19 ਸਕੂਲ ਗੇਮਜ਼ ਵਿੱਚ ਉਸਨੇ ਬੈਸਟ ਆਲ ਰਾਊਂਡਰ ਦਾ ਖਿਤਾਬ ਹਾਸਲ ਕੀਤਾ ਅਤੇ ਸਿਲਵਰ ਮੈਡਲ ਜਿੱਤਿਆ। ਦੱਸਣਯੋਗ ਹੈ ਕਿ ਵੀਹ ਸਾਲਾਂ ਬਾਅਦ ਲੜਕੀਆ ਦੀ ਕਬੱਡੀ ਖੇਡ ਵਿੱਚ ਮੈਡਲ ਆਇਆ। ਇਹ ਉਪਲੱਬਧੀ ਉਸਦੀ ਮਿਹਨਤ ਅਤੇ ਖੇਡ-ਹੁਨਰ ਦੀ ਸਭ ਤੋਂ ਵੱਡੀ ਤਸਦੀਕ ਹੈ। ਇਸ ਤੋਂ ਇਲਾਵਾ ਖੇਲੋ ਇੰਡੀਆ ਯੂਥ ਗੇਮਜ਼ ਵਿੱਚ ਉਸਨੇ ਕਾਂਸੇ ਦਾ ਤਗਮਾ ਜਿੱਤ ਕੇ ਦੇਸ਼ ਪੱਧਰ ‘ਤੇ ਪੰਜਾਬ ਦਾ ਨਾਮ ਰੋਸ਼ਨ ਕੀਤਾ।
ਗੰਗਾ ਸ਼ਰਮਾ ਦੀ ਕਾਮਯਾਬੀ ਦਾ ਸਫ਼ਰ ਇੱਥੇ ਹੀ ਨਹੀਂ ਰੁਕਿਆ। ਆਲ ਇੰਡੀਆ ਯੂਨੀਵਰਸਿਟੀ ਖੇਡਾਂ ਵਿੱਚ ਵੀ ਉਸਨੇ ਕਾਂਸਾ ਜਿੱਤ ਕੇ ਆਪਣੀ ਟੀਮ ਅਤੇ ਯੂਨੀਵਰਸਿਟੀ ਦਾ ਮਾਣ ਵਧਾਇਆ। ਇਹ ਉਪਲੱਬਧੀਆਂ ਉਸਦੇ ਦ੍ਰਿੜ ਇਰਾਦੇ ਅਤੇ ਖੇਡ ਪ੍ਰਤੀ ਉਸਦੀ ਲਗਨ ਨੂੰ ਦਰਸਾਉਂਦੀਆਂ ਹਨ। ਇਹ ਵੀ ਗੌਰਤਲਬ ਹੈ ਕਿ ਗੰਗਾ ਸ਼ਰਮਾ ਪੰਜਾਬ ਕਬੱਡੀ ਟੀਮ ਦੀ ਕਪਤਾਨ ਵਜੋਂ ਆਪਣੀ ਜ਼ਿੰਮੇਵਾਰੀ ਨਿਭਾ ਚੁੱਕੀ ਹੈ। ਇੱਕ ਕਪਤਾਨ ਵਜੋਂ ਉਹ ਨਾ ਸਿਰਫ਼ ਆਪਣੇ ਖੇਡ-ਹੁਨਰ ਨਾਲ ਸਾਥੀਆਂ ਨੂੰ ਪ੍ਰੇਰਿਤ ਕੀਤਾ, ਸਗੋਂ ਟੀਮ ਨੂੰ ਇਕਜੁੱਟ ਰੱਖਣ ਅਤੇ ਜਿੱਤ ਵੱਲ ਲੈ ਕੇ ਜਾਣ ਵਿੱਚ ਵੀ ਅਹਿਮ ਭੂਮਿਕਾ ਨਿਭਾਈ। ਇੱਕ ਖਿਡਾਰਨ ਦੇ ਨਾਲ-ਨਾਲ ਉਸਦੀ ਲੀਡਰਸ਼ਿਪ ਸਮਰੱਥਾ ਵੀ ਕਾਬਿਲ-ਏ-ਤਾਰੀਫ਼ ਹੈ।
ਗੰਗਾ ਸ਼ਰਮਾ ਆਪਣੀਆਂ ਉਪਲੱਬਧੀਆਂ ਦਾ ਸਿਹਰਾ ਆਪਣੇ ਕੋਚ ਮੰਗਾ ਸਿੰਘ ਅੰਟਾਲ ਅਤੇ ਪਰਿਵਾਰ ਨੂੰ ਦਿੰਦੀ ਹੈ। ਉਹ ਕਹਿੰਦੀ ਹੈ ਕਿ ਪਰਿਵਾਰ ਦਾ ਸਹਿਯੋਗ ਅਤੇ ਕੋਚ ਦਾ ਸਹੀ ਮਾਰਗ-ਦਰਸ਼ਨ ਅਤੇ ਮਿਹਨਤ ਨਾ ਹੁੰਦੀ ਤਾਂ ਇਹ ਸਫਲਤਾ ਸੰਭਵ ਨਹੀਂ ਸੀ। ਯੂਨੀਵਰਸਿਟੀ ਵਿੱਚ ਪੜ੍ਹਾਈ ਅਤੇ ਖੇਡਾਂ ਦੇ ਦੌਰਾਨ ਵੀ ਉਸਦੇ ਕੋਚ ਸਮੇਂ-ਸਮੇਂ ‘ਤੇ ਉਸਨੂੰ ਅਗਵਾਈ ਦਿੰਦੇ ਰਹਿੰਦੇ ਹਨ, ਜੋ ਉਸਦੇ ਲਈ ਬਹੁਤ ਵੱਡੀ ਪ੍ਰੇਰਣਾ ਹੈ। ਗੰਗਾ ਸ਼ਰਮਾ ਦੇ ਜੀਵਨ ਦਾ ਸਭ ਤੋਂ ਵੱਡਾ ਸੁਪਨਾ ਹੈ ਕਿ ਉਹ ਇੱਕ ਦਿਨ ਭਾਰਤੀ ਕਬੱਡੀ ਟੀਮ ਦੀ ਕਪਤਾਨ ਬਣੇ ਅਤੇ ਦੇਸ਼ ਲਈ ਮਾਣ ਵਾਲੀਆਂ ਉਪਲੱਬਧੀਆਂ ਹਾਸਲ ਕਰੇ। ਉਹ ਖਾਸ ਤੌਰ ‘ਤੇ ਏਸ਼ੀਆਈ ਖੇਡਾਂ ਵਿੱਚ ਭਾਰਤ ਲਈ ਮੈਡਲ ਜਿੱਤਣ ਦੀ ਇੱਛਾ ਰੱਖਦੀ ਹੈ। ਉਸਦਾ ਮੰਨਣਾ ਹੈ ਕਿ ਸਖਤ ਮਿਹਨਤ, ਅਨੁਸ਼ਾਸਨ ਅਤੇ ਦ੍ਰਿੜ ਇਰਾਦੇ ਨਾਲ ਹਰ ਸੁਪਨਾ ਸਾਕਾਰ ਕੀਤਾ ਜਾ ਸਕਦਾ ਹੈ। ਗੰਗਾ ਸ਼ਰਮਾ ਦੀ ਕਹਾਣੀ ਸਿਰਫ਼ ਇੱਕ ਖਿਡਾਰਨ ਦੀ ਕਾਮਯਾਬੀ ਦੀ ਕਹਾਣੀ ਨਹੀਂ, ਸਗੋਂ ਉਹਨਾਂ ਹਜ਼ਾਰਾਂ ਨੌਜਵਾਨਾਂ ਲਈ ਪ੍ਰੇਰਣਾ ਹੈ ਜੋ ਸੀਮਿਤ ਸਾਧਨਾਂ ਦੇ ਬਾਵਜੂਦ ਵੱਡੇ ਸੁਪਨੇ ਦੇਖਦੇ ਹਨ। ਉਸਨੇ ਸਾਬਤ ਕਰ ਦਿੱਤਾ ਹੈ ਕਿ ਗਰੀਬੀ ਕਦੇ ਵੀ ਕਿਸੇ ਦੀ ਕਾਬਲੀਅਤ ਨੂੰ ਰੋਕ ਨਹੀਂ ਸਕਦੀ, ਜੇ ਮਨ ਵਿੱਚ ਮਿਹਨਤ ਕਰਨ ਦਾ ਜਜ਼ਬਾ ਅਤੇ ਅੱਗੇ ਵੱਧਣ ਦੀ ਲਗਨ ਹੋਵੇ।ਅੱਜ ਗੰਗਾ ਸ਼ਰਮਾ ਵਰਗੀਆਂ ਖਿਡਾਰਨਾਂ ਪੰਜਾਬ ਦੀ ਧਰਤੀ ਦਾ ਮਾਣ ਵਧਾ ਰਹੀਆਂ ਹਨ। ਜੇ ਸਰਕਾਰ, ਖੇਡ ਸੰਸਥਾਵਾਂ ਅਤੇ ਸਮਾਜ ਵੱਲੋਂ ਉਨ੍ਹਾਂ ਨੂੰ ਯੋਗ ਸਹੂਲਤਾਂ ਅਤੇ ਮੌਕੇ ਮਿਲਣ ਤਾਂ ਇਹ ਖਿਡਾਰੀ ਅੰਤਰਰਾਸ਼ਟਰੀ ਪੱਧਰ ‘ਤੇ ਵੀ ਭਾਰਤ ਦਾ ਨਾਮ ਰੋਸ਼ਨ ਕਰ ਸਕਦੇ ਹਨ।
ਅੰਤ, ਵਿੱਚ ਕਹਿਣਾ ਉਚਿਤ ਹੋਵੇਗਾ ਕਿ ਗੰਗਾ ਸ਼ਰਮਾ ਦੀ ਇਹ ਯਾਤਰਾ ਅਜੇ ਸ਼ੁਰੂਆਤ ਹੀ ਹੈ। ਉਸਦੇ ਸੁਪਨੇ ਵੱਡੇ ਹਨ ਅਤੇ ਹੌਸਲੇ ਵੀ ਉਨ੍ਹਾਂ ਤੋਂ ਵੀ ਵੱਡੇ ਹਨ। ਆਉਣ ਵਾਲੇ ਸਮੇਂ ਵਿੱਚ ਇਹ ਨੌਜਵਾਨ ਖਿਡਾਰਨ ਨਿਸ਼ਚਿਤ ਤੌਰ ‘ਤੇ ਕਬੱਡੀ ਦੇ ਅੰਤਰਰਾਸ਼ਟਰੀ ਮੰਚਾਂ ‘ਤੇ ਭਾਰਤ ਦਾ ਤਿਰੰਗਾ ਲਹਿਰਾਉਂਦੀ ਨਜ਼ਰ ਆ ਸਕਦੀ ਹੈ।
